കുവൈത്ത് കോണ്‍സുലേറ്റിന് നേരെയുണ്ടായ ആക്രമണം; ഒമാന്‍ ശക്തമായി അപലപിച്ചു

ഇറാഖിലെ ബസ്റ നഗരത്തിലുള്ള കുവൈത്ത് കോണ്സുലേറ്റ് ജനറല് കെട്ടിടത്തിന് നേരെയുണ്ടായ ആക്രമണത്തെ ഒമാന് ശക്തമായി അപലപിച്ചു.

സംഭവം അന്താരാഷ്ട്ര നിയമങ്ങള്ക്കും നയതന്ത്ര ചട്ടങ്ങള്ക്കും വിരുദ്ധമാണെന്നും ഇതുപോലുള്ള നടപടികള് അംഗീകരിക്കാനാകില്ലെന്നും ഒമാന് വിദേശകാര്യ മന്ത്രാലയം പുറത്തിറക്കിയ പ്രസ്താവനയില് വ്യക്തമാക്കി.

നയതന്ത്രകോണ്സുലര് മിഷനുകളുടെ സുരക്ഷ ഉറപ്പാക്കേണ്ടത് അതത് രാജ്യങ്ങളുടെ ബാധ്യതയാണെന്ന് ഒമാന് ആവര്ത്തിച്ചു. കോണ്സുലേറ്റ് കെട്ടിടങ്ങള്ക്കും അവിടെയുള്ള ജീവനക്കാര്ക്കും ആവശ്യമായ സംരക്ഷണം നല്കുന്നതില് വീഴ്ച വരരുതെന്നും, സുരക്ഷ ശക്തമാക്കാന് ബന്ധപ്പെട്ട അധികാരികള് അടിയന്തര നടപടികള് സ്വീകരിക്കണമെന്നും ആവശ്യപ്പെട്ടു.

വിയന്ന കണ്വെന്ഷന് പ്രകാരം വിദേശ രാജ്യങ്ങളുടെ നയതന്ത്ര സ്ഥാപനങ്ങള്ക്ക് പ്രത്യേക പരിരക്ഷ നല്കേണ്ടത് അന്താരാഷ്ട്ര സമൂഹം അംഗീകരിച്ച അടിസ്ഥാന ചട്ടങ്ങളിലൊന്നാണെന്ന് ഒമാന് ചൂണ്ടിക്കാട്ടി. ഇത്തരം ആക്രമണങ്ങള് രാജ്യങ്ങള് തമ്മിലുള്ള ബന്ധങ്ങളെ പ്രതികൂലമായി ബാധിക്കുന്നതോടൊപ്പം മേഖലയില് അനാവശ്യമായ സംഘര്ഷാവസ്ഥക്കും വഴിവയ്ക്കുമെന്ന ആശങ്കയും പ്രസ്താവനയില് രേഖപ്പെടുത്തി.

ഇതിനിടെ, ബസ്റയില് ഉണ്ടായ സംഭവം അടുത്തിടെ റിപ്പോര്ട്ട് ചെയ്ത റോക്കറ്റ് ആക്രമണങ്ങളും തുടര്ന്ന് രൂപപ്പെട്ട സംഘര്ഷപരമായ സാഹചര്യങ്ങളും പിന്നാലെയാണെന്നാണു സൂചന. പ്രതിഷേധക്കാര് കോണ്സുലേറ്റ് പരിസരത്ത് കയറി നാശനഷ്ടങ്ങള് വരുത്തിയതായും ചില റിപ്പോര്ട്ടുകള് വ്യക്തമാക്കുന്നു. സുരക്ഷാസേന ഇടപെട്ട് സ്ഥിതി നിയന്ത്രണവിധേയമാക്കിയതായും അറിയുന്നു.

സംഭവത്തെ തുടര്ന്ന് കുവൈത്ത് ശക്തമായ പ്രതിഷേധം രേഖപ്പെടുത്തി. കോണ്സുലേറ്റിന്റെ സുരക്ഷയില് ഉണ്ടായ വീഴ്ചയെക്കുറിച്ച്‌ ഇറാഖ് അധികൃതരോട് വിശദീകരണം തേടിയതായും നയതന്ത്ര മാര്ഗങ്ങളിലൂടെ പ്രതിഷേധം അറിയിച്ചതായും റിപ്പോര്ട്ടുകളുണ്ട്.

ഗള്ഫ് മേഖലയിലെ നിലവിലെ സുരക്ഷാ സാഹചര്യങ്ങള് കണക്കിലെടുത്ത് എല്ലാ രാജ്യങ്ങളും ക്ഷമയും ഉത്തരവാദിത്തവും പാലിച്ച്‌ മുന്നോട്ട് പോകേണ്ടതുണ്ടെന്ന് ഒമാന് വീണ്ടും ഓര്മ്മിപ്പിച്ചു. പ്രശ്നങ്ങള് സമാധാനപരമായ മാര്ഗങ്ങളിലൂടെ പരിഹരിക്കണമെന്നും അന്താരാഷ്ട്ര നിയമങ്ങള് കര്ശനമായി പാലിക്കണമെന്നും പ്രസ്താവനയില് ആവര്ത്തിച്ചു.

Story Highlights:Oman strongly condemns attack on Kuwaiti consulate