ഒമാൻ:റോയല്‍ നേവി ഓഫ് ഒമാന്റെ കപ്പലായ ശബാബ് ഒമാൻ ടുവിന്റെ ഏഴാമത്തെ അന്താരാഷ്ട്ര യാത്രക്ക് തുടക്കമായി.
ഗ്ലോറീസ് ഓഫ് ദി സീസ്’ എന്ന പേരിലുള്ള യാത്രയില്‍, ശബാബ് ഒമാൻ 15 രാജ്യങ്ങളിലായി 24 തുറമുഖങ്ങളില്‍ നങ്കൂരമിടും. ലോകജനതക്കിടയില്‍ സൗഹൃദം, സമാധാനം, ഐക്യം എന്നിവ വളർത്തിയെടുക്കാനുള്ള ശ്രമങ്ങളുടെ ഭാഗമായാണ് സഞ്ചാരം.
ഒമാന്റെ സമ്ബന്നമായ സമുദ്ര പൈതൃകത്തിന്റെ സത്തയും അതിന്റെ ശോഭനമായ വർത്തമാനകാല നേട്ടങ്ങളും ഉള്‍ക്കൊള്ളുന്നതാണ് ഒമാൻ റോയല്‍ നേവിയുടെ കപ്പല്‍. ‘ഗ്ലോറീസ് ഓഫ് ദി സീസ്’ എന്ന പേരില്‍ നടത്തുന്ന ഏഴാമത്തെ അന്താരാഷട്ര യാത്രക്ക് സഈദ് ബിൻ സുല്‍ത്താൻ നാവിക താവളത്തില്‍ യാത്രയയപ്പ് നല്‍കി. ചടങ്ങിന് സ്റ്റേറ്റ് കൗണ്‍സില്‍ ചെയർമാൻ ശൈഖ് അബ്ദുല്‍മാലിക് ബിൻ അബ്ദുല്ല അല്‍ ഖലീലി നേതൃത്വം നല്‍കി.
യാത്രയില്‍, ശബാബ് ഒമാൻ ടു 30 ലക്ഷ്യസ്ഥാനങ്ങള്‍ സന്ദർശിക്കും. 15 രാജ്യങ്ങളിലായി 24 തുറമുഖങ്ങളില്‍ നങ്കൂരമിടും. ബ്രെമർഹാവൻ സെയില്‍ ഫെസ്റ്റിവല്‍, ആംസ്റ്റർഡാം സെയില്‍ ഫെസ്റ്റിവല്‍, ടോള്‍ ഷിപ്പ്‌സ് റേസുകള്‍ എന്നിവക്കൊപ്പം മറ്റ് സമുദ്ര ഉത്സവങ്ങളിലും ആഘോഷങ്ങളിലും പങ്കെടുക്കും.
ആറ് മാസത്തെ യാത്രയില്‍ 18,000 നോട്ടിക്കല്‍ മൈലിലധികം കപ്പല്‍ യാത്ര ചെയ്യും. സുല്‍ത്താന്റെ സായുധ സേന, മറ്റ് സൈനിക, സുരക്ഷാ സേവനങ്ങള്‍, വിദ്യാഭ്യാസ മന്ത്രാലയത്തിലെ ഡയറക്ടറേറ്റ് ജനറല്‍ ഓഫ് സ്‌കൗട്ട്‌സ് ആൻഡ് ഗേള്‍ ഗൈഡുകള്‍ എന്നിവയില്‍ നിന്നുള്ള 84 ട്രെയിനികളും ക്രൂവിനൊപ്പമുണ്ട്. ഒമാന്റെ സൗഹൃദം, സ്‌നേഹം, ഐക്യം എന്നീ സന്ദേശം ലോകത്തിന് എത്തിക്കാനും യാത്ര സഹായിക്കും. ഒമാനി സംസ്‌കാരം ഓരോ സ്റ്റോപ്പിലും പരിചയപ്പെടുത്തും. രാജ്യത്തിന്റെ അഭിമാനകരമായ സമുദ്ര ചരിത്രം, പുരാതന പാരമ്ബര്യങ്ങള്‍, ആധുനിക പുരോഗതി എന്നിവ പ്രദർശിപ്പിക്കും.
STORY HIGHLIGHTS:Shabab Oman Two’s seventh international tour has begun.
